پُنّو ءِ کیچ ءَ مرچی یک رندی پدا گوربامئیں سباہ گوں راج پُلانی شھیدیں سنج نکشیں ھونانی وشبوآں شِنگ اِت۔۔ اللہ ءِ مقدسیں روچ ءِ اولی برمشانی مُلا ءِ ٹوھینوکیں بانگ ھم کیچ مسلمانانی گوشاں نہ کپت۔۔چیاکہ عھد ءِ رستر ءِ دِلتراکیں بمب ءُ ٹوپانی تواراں کیچ سرا زُرتگ اَت۔۔۔ٹوپانی توار ءَ ھلک جاہ سِرینت۔۔۔۔۔پدا چی بیت بلوچ ءَ چار راج شھیدیں راج پُلانی سوغات رس اِت۔۔۔۔۔۔۔۔۔۔۔۔۔

بلوچ، عطایات ءِ کیچ مچ رنگ ءِ ودار ءَ ہرسال کنت۔ چیاکہ کیچ مچ رنگ ءِ گواھی گوں بلوچ ءِ وشیں باندات ءَ بندوک اِنت۔۔۔۔۔

                      (کیچ ءِ آمین)

         دُراھی ءِ آچش ءَ گون اِنت منی   مھر ءِ  آمین
         دِل منی لھڑی ئیں ایرھت ءِ غماں  آپ  کُتگ
        من پہ ھوشام ءِ غماں،یخ زدگ ءُ روچ زبہر
         چو گُشانے کہ گل ءَ  مچکدگ ءَ  تاپ  کُتگ
        چُش پہ یک رنگے انارکانی کلونٹاں بہ چشاں
         ما  وتی  واھگ ءِ  نیمون   پہ  تُن آپ    کُتگ
        پاشک تئی گندگ ءِ احوال چو رنگ ءِ گواھی
       عشق ءِ سر گوات ءَ دُرھیں مچکدگ ءَ چاپ کُتگ

         بیا او کوش لذتیں ،  مھکان چکین  گرکی   تل
         تئی وش نیادی ءِ  زِر نوداں پدا  تراپ کُتگ

        فاضل ءِ شیرکنیں شعر اَنت، تئی بالاد ءُ بدن
         شات ءِ شر رنگیں  ھیالان  ترا گوناپ کُتگ

بلے نوکیں سال ءَ کیچ مچ رنگ ءِ گواھی ءِ شبین راج پُلانی شھیدیں سُھریں ھونانی گوناپ ءَ سمبھینت۔۔۔۔ لھڑی ئیں ایرھت ءِ وداری ساھتاں، راج شھید ءِ رِتکگیں ھوناں پُنو کیچ جاہ نند ءِ دِل پدا آپ کُت۔۔۔۔ شبرھیں راج دلار ءَ وتی دیم سیاہ کُت ءُ دُشمن ءَ راج پُلانی نشان ڈس اِت۔۔۔۔۔۔۔۔۔۔۔۔۔۔۔۔۔۔۔

پُنو ھلک ءَ شبرہ ءُ شپ گِندیں دلّارانی کِسّہ سک دراج اِنت۔ گچکی راج بچّانی  نشان ڈسیں شپ گندیں دلارانی نشاناں کیچ جاہ نند سر نہ بوتگ اَت کہ میرو ھلک (بالگتر) شورھانی بوآں دمتوس کُت۔۔شھیدیں ھونانی وش بو میرو ءِ ویرانیں کشاراں تالان بوت۔۔۔ شپ گندیں راج دلار ءِ ڈس اِتگیں نشانانی پدا دُشمن میرو ھلک ءَ مان رِتک۔ کشار یک رندی پدا آدروہ بیتاں۔۔۔۔۔بلے کیچ جاہ نند ءَ ابئید ءِ شپ رہ ءُ شپ گندیں راج دلار ءِ شوھازگ ءَ نِشت ءُ وت ماں وت ءَ بھتان تراشی کُت۔۔۔۔ وت ماں وت پیڑ اِتاں۔۔۔۔۔۔ دنیگہ ھما ٹپ تازگ اِتنت کہ دُشمن ءَ شپ گِندیں دلار ءِ کمک ءَ دگہ ٹپے بلوچ کیچ جاہ نند ءِ دِلبند ءَ جَت۔۔۔۔۔۔۔۔۔۔۔۔۔۔۔۔

بلے کیچ جاہ نندیں بلوچ ءَ مارگ لوٹیت، چارگ لوٹیت۔۔ اے ڈسگ لوٹیت کہ اے کئے اِنت کہ گِس نندیں راج سرمچار ءِ نشاناں ڈس ایت۔۔ اے شبرہ کئے اِنت ؟۔۔۔ فون، میسج یا شپ گِندیں راج دَلّار۔۔۔۔ اگاں شپ گند ءُ چالاکیں راج دلار اِنت گُڑا آ کئے اِنت ءُ آئی ءِ نشانی چی اَنت؟ مارا وت ماں وت ءِ پیڑگ ءَ ابئید ھمے شپ گِند ءِ نشان ڈسگی اَنت۔۔ ھمے در گیجگی اِنت۔۔۔۔۔۔۔۔ گچکی بچ بہ بنت کہ بالگتر شھید یا ”گیبن” شھیدیں راج پُل ۔۔۔۔۔۔۔۔۔ بلے نشان ڈسیں شپ گندیں دلار ھمے یک اِنت۔۔۔ یا بندیک ءِ کڑی یکیں جاہ ءَ ھوار بنت۔۔۔۔۔

باریں اے شبرھیں نشان ڈس کئے اِنت؟ فون، میسج یا شپ گندیں راج دلار ؟؟؟؟؟؟